1. ಏಕಗವಾಕ್ಷಿ ಸಗಟು ಪುಸ್ತಕ ಖರೀದಿ ಯೋಜನೆ :

(1)ಕರ್ನಾಟಕ ಸರ್ಕಾರ ಪುಸ್ತಕ ಸಂಸ್ಕೃತಿಯ ಭಾಗವಾಗಿ ಕನ್ನಡ ಪುಸ್ತಕಗಳ ಲೇಖಕರಿಗೆ, ಪ್ರಕಾಶಕರಿಗೆ ಪ್ರೋತ್ಸಾಹದಾಯಕ ಯೋಜನೆಯಾಗಿ ‘ಏಕಗವಾಕ್ಷಿ ಸಗಟು ಪುಸ್ತಕ ಖರೀದಿ ಯೋಜನೆ’ಯನ್ನು 2006ರಿಂದ ಅನೇಕ ಹಿರಿಯ ಸಾಹಿತಿಗಳು, ಚಿಂತಕರ ಒತ್ತಾಸೆಯಿಂದ ಅನುಷ್ಠಾನಕ್ಕೆ ತಂದಿದೆ. ಸರ್ಕಾರ ರಚಿಸಿರುವ ಉನ್ನತ ಮಟ್ಟದ ಪುಸ್ತಕ ಆಯ್ಕೆ ಸಮಿತಿಯಿಂದ ಆಯ್ಕೆಯಾದ ಪುಸ್ತಕಗಳನ್ನು ತಲಾ 300 ಪ್ರತಿಗಳನ್ನು ಖರೀದಿಸಿ, ಗ್ರಾಮ ಪಂಚಾಯಿತಿ ಗ್ರಂಥಾಲಯಗಳು, ಶಾಖಾ ಗ್ರಂಥಾಲಯಗಳು ಹಾಗೂ ಇತರ ಆರ್ಥಿಕವಾಗಿ ಹಿಂದುಳಿದ ಗ್ರಂಥಾಲಯಗಳಿಗೆ ವಿತರಿಸುವುದನ್ನು ಜಾರಿಗೆ ತಂದಿದ್ದರು.

ಆದರೆ ಸರ್ಕಾರ ಈ ಯೋಜನೆಗೆ ಕಾಲಕಾಲಕ್ಕೆ ಕ್ರಮಬದ್ಧವಾಗಿ ಅನುದಾನವನ್ನು ನೀಡದೆ, 2021ನೇ ಸಾಲಿನಿಂದ ಈ ಯೋಜನೆ ಸ್ಥಗಿತವಾಗಿ ನೆನೆಗುದಿಗೆ ಬಿದ್ದಿದೆ. ಜೊತೆಗೆ 2020ನೇ ಸಾಲಿನಲ್ಲಿ ಆಯ್ಕೆಯಾಗಿ 31-03-2024ರಂದು ಖರೀದಿಸಿದ್ದ ಸಗಟು ಪುಸ್ತಕ ಖರೀದಿ ಬಾಕಿ ಮೊತ್ತ ರೂ. 6.87 ಕೋಟಿ ಹಣ ಲೇಖಕರು, ಪ್ರಕಾಶಕರಿಗೆ ಇನ್ನೂ ಪಾವತಿಯಾಗಿಲ್ಲ. ಜ್ಞಾನವನ್ನು ಹಂಚಿ, ಸಾರ್ವಜನಿಕರಲ್ಲಿ ಪುಸ್ತಕ ಸಂಸ್ಕೃತಿಯ ಬಗ್ಗೆ ಅರಿವು ಮೂಡಿಸಲು ಹೊರಟಿರುವ ಲೇಖಕರು, ಪ್ರಕಾಶಕರು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಅಕ್ಕಪಕ್ಕದ ರಾಜ್ಯಗಳಲ್ಲಿ ಸ್ಥಳೀಯ ಭಾಷೆಯ ಪುಸ್ತಕಗಳನ್ನು ಸಾವಿರಾರು ಸಂಖ್ಯೆಯಲ್ಲಿ ಖರೀದಿಸುತ್ತಿವೆ. ಉದಾಹರಣೆಗೆ ತಮಿಳುನಾಡು ಮತ್ತು ಕೇರಳ ರಾಜ್ಯಗಳಲ್ಲಿ ಸರ್ಕಾರವೇ ನೇರವಾಗಿ ಪ್ರತಿ ವರ್ಷ ಗ್ರಂಥಾಲಯಗಳಿಗೆ ಹಣ ಬಿಡುಗಡೆ ಮಾಡಿ ನಂತರ ಸ್ಥಳೀಯ ಸಂಸ್ಥೆಗಳಿಂದ ವಸೂಲಾದ ತೆರಿಗೆ ಮೊತ್ತವನ್ನು ಸರ್ಕಾರಕ್ಕೆ ಜಮಾ ಮಾಡಿಸಿಕೊಳ್ಳುತ್ತದೆ. ಸರ್ಕಾರಗಳೇ ಪುಸ್ತಕ ಪ್ರದರ್ಶನಗಳನ್ನು ಏರ್ಪಡಿಸಿ ಪುಸ್ತಕ ಸಂಸ್ಕೃತಿಯನ್ನು ಎಲ್ಲೆಡೆ ವಿಸ್ತರಿಸುತ್ತಿದ್ದಾರೆ.

ಈಗಾಗಲೇ 31-03-2026ರ ಅಂತ್ಯಕ್ಕೆ ರಾಜ್ಯದ ವಿವಿಧ ಜಿಲ್ಲಾ/ನಗರ ಕೇಂದ್ರ ಗ್ರಂಥಾಲಯಗಳಲ್ಲಿ ಅಂದಾಜು 800 ಕೋಟಿ ರೂ. ಗ್ರಂಥಾಲಯ ಕರ ಬಾಕಿ ಇದ್ದು, ಸದರಿ ಮೊತ್ತವನ್ನು ಕೂಡಲೇ ಗ್ರಂಥಾಲಯ ಇಲಾಖೆಗೆ ಪಾವತಿಸಿಕೊಂಡು, ಮೂಲ ಸೌಕರ್ಯಗಳನ್ನು ಒದಗಿಸುವ ಮೂಲಕ ಗ್ರಂಥಾಲಯಗಳ ಸರ್ವತೋಮುಖ ಅಭಿವೃದ್ಧಿಗೆ ಸರ್ಕಾರವು ಇಚ್ಛಾಶಕ್ತಿಯನ್ನು ಪ್ರದರ್ಶಿಸಬೇಕು ಎಂದು ಮನವಿ ಮಾಡಿಕೊಳ್ಳುತ್ತೇವೆ.

(2)ಯೋಜನೆಗೆ ಶಾಶ್ವತ ಪರಿಹಾರ :

ಸಾರ್ವಜನಿಕ ಗ್ರಂಥಾಲಯ ಇಲಾಖೆಯಲ್ಲಿ ಕಾನೂನಾತ್ಮಕವಾಗಿ ಸರ್ಕಾರ ರಚಿಸಿರುವ ‘ರಾಜ್ಯ ಗ್ರಂಥಾಲಯ ಪ್ರಾಧಿಕಾರ’ (State Library Authority) ಸಮಿತಿ ಇದ್ದು, ಈ ಸಮಿತಿಗೆ ಇಲಾಖೆಯ ಕಾರ್ಯದರ್ಶಿಯವರೇ ಅಧ್ಯಕ್ಷರಾಗಿರುತ್ತಾರೆ. ಆದರೆ ಕಳೆದ 3-4 ವರ್ಷಗಳಿಂದ ಸಮಿತಿಯು ಅಸ್ತಿತ್ವಕ್ಕೆ ಬಂದಿಲ್ಲ.

ರಾಜ್ಯದ ವಿವಿಧ ಜಿಲ್ಲಾ/ನಗರ ಕೇಂದ್ರ ಗ್ರಂಥಾಲಯಗಳು ಪ್ರತಿ ವರ್ಷ ವಸೂಲಾದ ಗ್ರಂಥಾಲಯ ಕರದ ಮೊತ್ತದ ಶೇಕಡಾ 5ರಷ್ಟು ರಾಜ್ಯ ಗ್ರಂಥಾಲಯ ಪ್ರಾಧಿಕಾರ ನಿಧಿಗೆ ಜಮಾ ಮಾಡಲಾಗುತ್ತದೆ. ಬೆಂಗಳೂರು ನಗರದಿಂದ ಶೇಕಡಾ 10ರಷ್ಟು ಹಣ ಜಮಾ ಆಗುತ್ತದೆ.

ಸದರಿ ಮೊತ್ತವನ್ನು ರಾಜ್ಯದ ಗ್ರಂಥಾಲಯಗಳ ಸಮಗ್ರ ಅಭಿವೃದ್ಧಿ ಮತ್ತು ಮೂಲ ಸೌಕರ್ಯಕ್ಕೆ ಬಳಸಬಹುದಾಗಿರುತ್ತದೆ. ಆದರೆ ಕಳೆದ 4 ವರ್ಷಗಳಿಂದ ರಾಜ್ಯ ಗ್ರಂಥಾಲಯ ಪ್ರಾಧಿಕಾರ ಸಭೆ ನಡೆಸದೆ ಅಂದಾಜು 50 ಕೋಟಿ ಮೊತ್ತದಷ್ಟು ಹಣ ಸಂಗ್ರಹವಾಗಿದ್ದು, ಯಾವುದೇ ಅಭಿವೃದ್ಧಿ ಕೆಲಸಕ್ಕಾಗಿ ವಿನಿಯೋಗಿಸದೆ ಇರುವುದರಿಂದ ಸದರಿ ಮೊತ್ತವು ಆಯುಕ್ತರ ಲೆಕ್ಕ ಶೀರ್ಷಿಕೆಯಲ್ಲಿ ಜಮೆಯಾಗಿರುತ್ತದೆ.

ಈ ರೀತಿ ಪ್ರತಿ ವರ್ಷ ಸಂಗ್ರಹವಾಗುವ ಮೊತ್ತದಲ್ಲಿ ರೂ.20 ಕೋಟಿಯ ವೆಚ್ಚದ ಮಿತಿಯಲ್ಲಿ ಆಯಾ ವರ್ಷ ರಾಜ್ಯ ಮಟ್ಟದ ಪುಸ್ತಕ ಆಯ್ಕೆ ಸಮಿತಿಯಿಂದ ಆಯ್ಕೆಯಾದ ಪ್ರತಿ ಶೀರ್ಷಿಕೆಯ ತಲಾ 300 ಪ್ರತಿಗಳನ್ನು ಅಥವಾ ರೂ.2.50 ಲಕ್ಷ ಮಿತಿಯಂತೆ ಖರೀದಿಸುವ ಮೂಲಕ ಪುಸ್ತಕ ಸಂಸ್ಕೃತಿಯನ್ನು ಉಳಿಸಿ ಬೆಳೆಸಬೇಕೆಂದು ಈ ಮೂಲಕ ರಾಜ್ಯದ ಎಲ್ಲಾ ಲೇಖಕರು, ಲೇಖಕ ಪ್ರಕಾಶಕರು, ಪ್ರಕಾಶನ ಸಂಸ್ಥೆಗಳ ಪರವಾಗಿ ಸರ್ಕಾರವನ್ನು ಒತ್ತಾಯಿಸುತ್ತಿದ್ದೇವೆ.

ಈ ಬಗ್ಗೆ ಮಾನ್ಯ ಇಲಾಖೆಯ ಆಯುಕ್ತರು ಸರ್ಕಾರಕ್ಕೆ ಸೂಕ್ತ ಪ್ರಸ್ತಾವನೆಯನ್ನು ಸಲ್ಲಿಸಿ ನೆನೆಗುದಿಗೆ ಬಿದ್ದಿರುವ ಏಕಗವಾಕ್ಷಿ ಯೋಜನೆಗೆ ಮರುಚಾಲನೆ ನೀಡಬೇಕಾಗಿ ಕಳಕಳಿಯಿಂದ ವಿನಂತಿಸುತ್ತೇವೆ.

(3) ಸಾರ್ವಜನಿಕ ಗ್ರಂಥಾಲಯ ಇಲಾಖೆಯಲ್ಲಿ ಸೃಜಿಸಲಾದ 5766+330 ಗ್ರಾಮ ಪಂಚಾಯಿತಿ ಗ್ರಂಥಾಲಯಗಳನ್ನು ಸರ್ಕಾರದ ಆದೇಶ ಸಂಖ್ಯೆ: ED 64 LIB 2015 ದಿನಾಂಕ: 26-02-2019ರ ಮೂಲಕ ಹೆಚ್ಚಿನ ಕೆಲಸದ ಒತ್ತಡವಿರುವ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ರಾಜ್ ಇಲಾಖೆಗೆ ವರ್ಗಾಯಿಸಲಾಗಿದೆ.

ಆದರೆ ನಿರ್ವಹಣೆ ಸರಿಯಾಗಿಲ್ಲದೆ, ಸಾರ್ವಜನಿಕರಿಗೆ ಗ್ರಂಥಾಲಯಗಳ ಸೇವೆ ಸರಿಯಾಗಿ ಸಿಗುತ್ತಿಲ್ಲ, ಹಲವು ಮೇಲ್ವಿಚಾರಕರು ಆತ್ಮಹತ್ಯೆಯನ್ನು ಮಾಡಿಕೊಂಡಿದ್ದಾರೆ. ದಿನಾಂಕ: 15-05-2026 ವಿಜಯ ಕರ್ನಾಟಕ ಪತ್ರಿಕೆಯಲ್ಲಿ “6500 ಗ್ರಾಮೀಣ ಗ್ರಂಥಾಲಯಗಳು ಸ್ಥಗಿತ”** ಎಂಬ ಶೀರ್ಷಿಕೆಯಡಿ 6 ತಿಂಗಳಿಂದ ಬಾಗಿಲು ತೆರೆಯದ ಜ್ಞಾನ ದೇಗುಲಗಳು ಎಂದು ಪ್ರಕಟವಾಗಿದೆ.

ಇದರಿಂದಾಗಿ ಗ್ರಾಮೀಣ ಭಾಗದ ನಿರೀಕ್ಷೆಗೆ ಹಿನ್ನಡೆಯಾಗಿರುವುದನ್ನೆಲ್ಲಾ ಪರಾಮರ್ಶಿಸಿ ಗ್ರಂಥಾಲಯಗಳಿಗಾಗಿಯೇ ಇರುವ ‘ಸಾರ್ವಜನಿಕ ಗ್ರಂಥಾಲಯ ಇಲಾಖೆ’ಗೆ ಮತ್ತೆ ಅವುಗಳನ್ನು ವರ್ಗಾಯಿಸುವ ಮೂಲಕ ಇಲಾಖೆಯನ್ನು ಬಲಪಡಿಸಿ, ಜ್ಞಾನದ ಅರಿವನ್ನು ರಾಜ್ಯ ಗ್ರಂಥಾಲಯ ಪ್ರಾಧಿಕಾರದ ಮೂಲಕ ಏಕಗವಾಕ್ಷಿ ಸಗಟು ಪುಸ್ತಕ ಖರೀದಿ ಯೋಜನೆಯನ್ನು ಜಾರಿಗೆ ತಂದು ಪುಸ್ತಕ ಸಂಸ್ಕೃತಿಗೆ ಒತ್ತು ನೀಡಲು ಕಳಕಳಿಯಿಂದ ಒತ್ತಾಯಿಸುತ್ತಿದ್ದೇವೆ.

2. ವಾರ್ಷಿಕ ಕ್ರಿಯಾ ಯೋಜನೆ (ಬಜೆಟ್)

ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ ವಾರ್ಷಿಕ ಬಜೆಟ್ ಅನ್ನು ಕರ್ನಾಟಕ ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ ಲೆಕ್ಕಪತ್ರಗಳ ನಿಯಮಾವಳಿಗಳು 1975ರ ಅಧ್ಯಾಯ-11, ಬಜೆಟ್ ಉಪನಿಯಮ 30(A), (B), (C) ಪ್ರಕಾರ ಪ್ರತಿಯೊಂದು ಜಿಲ್ಲಾ/ನಗರ ಗ್ರಂಥಾಲಯಗಳು ಮುಂದಿನ ವರ್ಷಕ್ಕಾಗಿ ನಿರೀಕ್ಷಿತ ಸ್ವೀಕೃತಿ ಮತ್ತು ಉದ್ದೇಶಿತ ಖರ್ಚುಗಳ ಅಂದಾಜನ್ನು ಪ್ರತಿ ವರ್ಷ ಜನವರಿ ತಿಂಗಳಲ್ಲಿ ಸಂಬಂಧಿಸಿದ ಪ್ರಾಧಿಕಾರ ಸಭೆಯಲ್ಲಿ ಮಂಡಿಸಿ ಅನುಮೋದನೆ ಪಡೆದು, ಅನುಮೋದಿತ ಬಜೆಟ್ ಪ್ರತಿಗಳನ್ನು ಆಯುಕ್ತರು, ಸಾರ್ವಜನಿಕ ಗ್ರಂಥಾಲಯ ಇಲಾಖೆ, ಬೆಂಗಳೂರು ಇವರಿಗೆ ಅನುಮೋದನೆಗಾಗಿ ಕಳುಹಿಸಬೇಕು ಎಂದು ನಮೂದಾಗಿದೆ.

ಅಲ್ಲದೆ ಸರ್ಕಾರದ ಆದೇಶ ಸಂಖ್ಯೆ: DE 08 TFP 2023 ದಿನಾಂಕ: 28-10-2024ರ ಪ್ರಕಾರ ಆರ್ಥಿಕ ಇಲಾಖೆಯು ಇಲಾಖಾ ಮುಖ್ಯಸ್ಥರಿಗೆ ಪ್ರತ್ಯಾಯೋಜಿಸಲಾದ ಹಣಕಾಸಿನ ಅಧಿಕಾರದ ಮಿತಿಯೊಳಗೆ ರೂ.2.00 ಕೋಟಿಯವರೆಗೆ ಇರುವ ಬಜೆಟ್‌ಗಳನ್ನು ಮಾನ್ಯ ಆಯುಕ್ತರೇ ಅನುಮೋದನೆ ನೀಡಿ ಸಂಬಂಧಿಸಿದ ಜಿಲ್ಲಾ/ನಗರ ಗ್ರಂಥಾಲಯಗಳಿಗೆ ಕಳುಹಿಸಬಹುದಾಗಿರುತ್ತದೆ.

ರೂ.5.00 ಕೋಟಿಯ ಮಿತಿಯೊಳಗಿರುವ ಬಜೆಟ್‌ಗಳನ್ನು ಸರ್ಕಾರದ ಪ್ರಧಾನ ಕಾರ್ಯದರ್ಶಿಗಳು ಅನುಮೋದಿಸಿ ನಿಗದಿತ ಅವಧಿಯೊಳಗೆ ಅನುಮೋದನೆ ನೀಡಬಹುದಾಗಿರುತ್ತದೆ. ರೂ.5.00 ಕೋಟಿಗೂ ಹೆಚ್ಚಿನ ಮೊತ್ತದ ಬಜೆಟ್ ಅನುಮೋದನೆಗೆ ಆರ್ಥಿಕ ಇಲಾಖೆ ಮತ್ತು ಸಂಬಂಧಿಸಿದ ಸಚಿವರ ಅನುಮೋದನೆ ಅವಶ್ಯಕವಾಗಿರುತ್ತದೆ ಎಂದು ಆದೇಶವಾಗಿದೆ.

ಆದ್ದರಿಂದ ದಯಮಾಡಿ ನಿಯಮಾನುಸಾರ ಮೇ ಅಥವಾ ಜೂನ್ ತಿಂಗಳಲ್ಲಿ ಕ್ರಿಯಾ ಯೋಜನೆಯನ್ನು ಅನುಮೋದಿಸಲು ಕೋರುತ್ತೇವೆ.

3. ಪುಸ್ತಕ ಖರೀದಿ ವಿಧಾನದಲ್ಲಿ ಪರಿಷ್ಕರಣೆ

ಸರ್ಕಾರದ ಆದೇಶದ ಸಂಖ್ಯೆ EP 105 LIB 2025 ದಿನಾಂಕ: 18.02.2026, ಸರ್ಕಾರದ ತಿದ್ದುಪಡಿ ಸಂಖ್ಯೆ EP 105 LIB 2025 ದಿನಾಂಕ: 18.02.2026ರ ಆದೇಶದನ್ವಯ ಸಾರ್ವಜನಿಕ ಗ್ರಂಥಾಲಯ ಇಲಾಖೆಯಲ್ಲಿನ ಪುಸ್ತಕಗಳ ಆಯ್ಕೆ ಮತ್ತು ಖರೀದಿಯ ಮಾರ್ಗಸೂಚಿಗಳನ್ನು ಸಂಘ ಸಂಸ್ಥೆಗಳ ಪ್ರತಿನಿಧಿಗಳನ್ನು, ಸಾಹಿತ್ಯ ಚಿಂತಕರನ್ನು, ಹಿರಿಯ ಸಾಹಿತಿಗಳ ಅಭಿಪ್ರಾಯಗಳನ್ನು ಪಡೆಯದೆ ಪರಿಷ್ಕರಿಸಲಾಗಿದೆ.

ಕರ್ನಾಟಕದಲ್ಲಿ ಕನ್ನಡವೇ ಸಾರ್ವಭೌಮ ಭಾಷೆ. ಇಂತಹ ಭಾಷೆಯ ಪುಸ್ತಕಗಳನ್ನು 2022ನೇ ಸಾಲಿನಿಂದಲೂ ಗ್ರಂಥಾಲಯಗಳಿಗೆ ಖರೀದಿಸದೆ, ಖರೀದಿಸಿರುವ ಪುಸ್ತಕಗಳಿಗೆ ಹಣ ಪಾವತಿಸದೆ, ಸಾರ್ವಜನಿಕರಿಗೆ, ವಿದ್ಯಾರ್ಥಿಗಳಿಗೆ ಅಗತ್ಯವಾದ ಹೊಸ ಪುಸ್ತಕಗಳನ್ನು ಖರೀದಿಸಲು ಸರ್ಕಾರದ ಆದೇಶ ಸಂಖ್ಯೆ: ED 1 LIBP 2004 ದಿನಾಂಕ: 07-02-2005ರ ಆದೇಶದಲ್ಲಿರುವ ಅನುಬಂಧ-1ರ ಕಂಡಿಕೆ (17) ಮತ್ತು (20)ರ ಪ್ರಕಾರ ಪುಸ್ತಕ ಆಯ್ಕೆ ಸಮಿತಿಗೆ ಅಧಿಕಾರವಿತ್ತು.

ಇದರ ಜೊತೆಗೆ ಅದೇ ಸರ್ಕಾರದ ಆದೇಶದ ಉಲ್ಲೇಖ (3)ರ ಪ್ರಕಾರ ಮುಖ್ಯ ಗ್ರಂಥಾಲಯಾಧಿಕಾರಿಗಳ ವಿವೇಚನಾ ಕೋಟಾದಲ್ಲಿ ಶೇ.75ರಷ್ಟು ಸ್ಪರ್ಧಾತ್ಮಕ, ಪಠ್ಯಪುಸ್ತಕ, ಪರಾಮರ್ಶನ, ಸ್ಥಳೀಯ ಬೇಡಿಕೆಯ ಪುಸ್ತಕಗಳನ್ನು ಖರೀದಿಸಲು ಅವಕಾಶವಿತ್ತು.

ಆದರೆ ಇವುಗಳನ್ನೆಲ್ಲಾ ಗಣನೆಗೆ ತೆಗೆದುಕೊಳ್ಳದೆ ಏಕಕಡತದ ಮೂಲಕ ಒಟ್ಟು ಹಣದಲ್ಲಿ ಶೇ.40ರಷ್ಟು ಸ್ಪರ್ಧಾತ್ಮಕ, ಪಠ್ಯಪುಸ್ತಕ, ಪರಾಮರ್ಶನ, ಓದುಗರ ಬೇಡಿಕೆಗಳಿಗೆ K.P.T.T. ಕಾಯ್ದೆ ಮತ್ತು ನಿಯಮಗಳನ್ವಯ ಪಾರದರ್ಶಕ ಟೆಂಡರ್ ಮೂಲಕ ಪುಸ್ತಕಗಳನ್ನು ಖರೀದಿಸಲು ಆದೇಶ ಹೊರಡಿಸಿರುತ್ತಾರೆ.

ಕನ್ನಡ ಭಾಷೆ ಹಾಗೂ ಸಂಸ್ಕೃತಿಯ ಬೆಳವಣಿಗೆಗಾಗಿ ಹೆಚ್ಚೆಚ್ಚಾಗಿ ಪ್ರಕಟವಾಗುತ್ತಿರುವ ಕನ್ನಡ ಸಾಹಿತ್ಯದ ಪುಸ್ತಕಗಳ ಖರೀದಿಯನ್ನು ಹಾಲಿ ಇರುವ ಶೇ.40ರಿಂದ 20ಕ್ಕೆ ಇಳಿಸಿರುವುದು ಪ್ರಶ್ನಾರ್ಹವಾಗಿದೆ. 2000 ವರ್ಷಗಳ ಇತಿಹಾಸವಿರುವ ಕನ್ನಡ ಭಾಷೆಗೆ ಕನ್ನಡ ಸಾಹಿತ್ಯಕ್ಕೆ ಅನ್ಯಾಯವಾಗುತ್ತದೆ.

ಸರ್ಕಾರದ ಆದೇಶ ಸಂಖ್ಯೆ: EP 105 LIB 2025 ದಿನಾಂಕ: 18.02.2026ರ ಆದೇಶವನ್ನು ರದ್ದುಪಡಿಸಲು ಹಾಗೂ ಹಿಂದಿನ ಆದೇಶದಂತೆ ಪುಸ್ತಕ ಖರೀದಿಸಲು ವಿನಂತಿಸುತ್ತಿದ್ದೇವೆ.

ಈ ಬಗ್ಗೆ ಮುಖ್ಯಮಂತ್ರಿಗಳು ಈಗಾಗಲೇ ಟಿಪ್ಪಣಿ ಕಳುಹಿಸಿದ್ದಾರೆ. ಉನ್ನತ ಮಟ್ಟದ ಆಯ್ಕೆ ಸಮಿತಿಯೇ ಪುಸ್ತಕದ ಅಂಗಡಿ, ಪುಸ್ತಕ ಪ್ರದರ್ಶನಗಳಿಗೆ ಭೇಟಿ ನೀಡಿ ಅಗತ್ಯವಿರುವ ಪುಸ್ತಕಗಳನ್ನು ಆಯ್ಕೆ ಮಾಡಿ, ಖರೀದಿಸುವಂತೆ ಸೂಚಿಸಬೇಕು.

ಸಾರ್ವಜನಿಕ ಗ್ರಂಥಾಲಯಗಳಿಗೆ ಪುಸ್ತಕಗಳನ್ನು ಟೆಂಡರ್ ಮೂಲಕ ಖರೀದಿಸುವುದನ್ನು ರದ್ದುಪಡಿಸಬೇಕು. ಪುಸ್ತಕಗಳು ಸರಕಲ್ಲ ಜ್ಞಾನ.

4. ಬೆಲೆ ನಿಗದಿ

ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ ವ್ಯಾಪ್ತಿಯಲ್ಲಿ ಬರುವ ಗ್ರಂಥಾಲಯಗಳಲ್ಲಿ ದಿನಾಂಕ: 01-04-2018ರಿಂದ ಮುದ್ರಣಗೊಳ್ಳುವ ಹಾಗೂ ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ ಪುಸ್ತಕ ಖರೀದಿ ಆಯ್ಕೆ ಸಮಿತಿಯ ಶಿಫಾರಸ್ಸಿನ ಅನ್ವಯ ಸಾರ್ವಜನಿಕ ಗ್ರಂಥಾಲಯ ಇಲಾಖೆಗೆ ಸರಬರಾಜಾಗುವ ಪುಸ್ತಕಗಳ ಪ್ರತಿ ಪುಟಕ್ಕೆ 20 ಪೈಸೆಯನ್ನು ಹೆಚ್ಚಿಸಿ ಸರ್ಕಾರವು ಅನುಮೋದನೆ ನೀಡಿರುತ್ತದೆ.

ಪುಸ್ತಕಗಳ ಬೆಲೆಯನ್ನು ಹೆಚ್ಚಿಸಿ ಈಗಾಗಲೇ 8 ವರ್ಷಗಳು ಕಳೆದಿದ್ದು, ಮುದ್ರಣ ಮತ್ತು ಮುದ್ರಣಕ್ಕೆ ಬೇಕಾದ ಎಲ್ಲಾ ಪರಿಕರಗಳ ಬೆಲೆಯಲ್ಲಿ ಗಣನೀಯ ಏರಿಕೆಯಾಗಿದೆ. ಮುದ್ರಣಕ್ಕೆ ಬಳಸುವ ಕಾಗದದ ಬೆಲೆ ಕಳೆದ 8 ವರ್ಷಗಳಲ್ಲಿ ಶೇ.60ರಷ್ಟು ಏರಿಸಲಾಗಿದೆ. ಕಾಗದದ ಜಿಎಸ್‌ಟಿಯನ್ನು 12%ರಿಂದ 18%ಗೆ ಏರಿಸಲಾಗಿದೆ. ವಿದ್ಯುತ್ ಶಕ್ತಿ ಬಿಲ್ಲುಗಳನ್ನು ಶೇ.50% ಏರಿಸಲಾಗಿದೆ.

ಮುದ್ರಣಕ್ಕೆ ಬಳಸುವ ಇಂಕು, ಬೈಡಿಂಗ್, ಕೂಲಿ, ಸಾಗಾಣಿಕೆ ವೆಚ್ಚಗಳು ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿರುವುದರಿಂದ ಪುಸ್ತಕ ಪ್ರಕಟಣೆ ಕಷ್ಟ ಸಾಧ್ಯವಾಗಿದೆ.

ಆದ್ದರಿಂದ ದಯಮಾಡಿ ಪ್ರತಿ ಪುಟಕ್ಕೆ 50 ಪೈಸೆ ಹೆಚ್ಚಿಸಲು ಹಾಗೂ ಇನ್ನು ಮುಂದೆ ಪ್ರತಿ 2 ವರ್ಷಗಳಿಗೆ ಗ್ರಂಥಾಲಯ ಇಲಾಖೆಗೆ ಖರೀದಿಸುವ ಎಲ್ಲಾ ಭಾಷೆಗಳ ಪುಸ್ತಕಗಳ ಬೆಲೆಯಲ್ಲಿ ಶೇ.10% ಹೆಚ್ಚಿಸಲು ಕ್ರಮಕೈಗೊಳ್ಳಬೇಕೆಂದು ಈ ಮೂಲಕ ತಮ್ಮಲ್ಲಿ ಕಳಕಳಿಯಿಂದ ವಿನಂತಿಸಿಕೊಳ್ಳುತ್ತೇವೆ.

5. ಪುಸ್ತಕ ಖರೀದಿ ಮತ್ತು ಆಯ್ಕೆ

ಸಾರ್ವಜನಿಕ ಗ್ರಂಥಾಲಯ ಇಲಾಖೆಯಲ್ಲಿ 2022ನೇ ಸಾಲಿನ ಪುಸ್ತಕ ಖರೀದಿ ಹಾಗೂ 2023, 2024, 2025ನೇ ಸಾಲಿನ ಪುಸ್ತಕಗಳ ಆಯ್ಕೆ ಮತ್ತು ಖರೀದಿಯನ್ನು ನಿಗದಿತ ಅವಧಿಯಲ್ಲಿ ಮುಗಿಸಿ ‘ಒಂದು ಬಾರಿ ವಿಶೇಷ ಖರೀದಿ’ ಎಂದು ಪರಿಗಣಿಸಿ ಹಿಂದಿನ ಸಾಲಿನ ಪುಸ್ತಕಗಳ ಆಯ್ಕೆ ಮತ್ತು ಖರೀದಿ ಮುಗಿಸಿ ಓದುಗರಿಗೆ ನೀಡಿದರೆ, ಮುಂದೆ ಆಯಾ ವರ್ಷದಲ್ಲಿಯೇ ಹೊಸ ಪುಸ್ತಕಗಳು ಓದುಗರಿಗೆ, ವಿದ್ಯಾರ್ಥಿಗಳಿಗೆ, ಮಹಿಳೆಯರಿಗೆ, ಹಿರಿಯ ನಾಗರಿಕರಿಗೆ ಸಿಗುವಂತಾಗಲು ಸಹಕಾರಿಯಾಗುತ್ತದೆ.

ಈ ಬಗ್ಗೆ ಸರ್ಕಾರ ಸೂಕ್ತ ಕ್ರಮ ತೆಗೆದುಕೊಳ್ಳಲು ವಿನಂತಿಸುತ್ತಿದ್ದೇವೆ.

ಆಯ್ಕೆಯಾದ ಪುಸ್ತಕಗಳನ್ನು ಖರೀದಿಸಲು ಅಧಿಕಾರಿಗಳು ಸ್ಥಳಾವಕಾಶವಿಲ್ಲ, ಬ್ರಾಂಚ್‌ಗಳಿಗೆ ಸಾಗಾಣಿಕೆ ಮಾಡಿಲ್ಲ ಇತ್ಯಾದಿ ಕಾರಣಗಳನ್ನು ಹೇಳುವ ಬದಲು, ನಿಯಮಾನುಸಾರ 10 ವರ್ಷಗಳಾದ ಹಳೆಯದಾದ ಅನುಪಯುಕ್ತ ಪುಸ್ತಕಗಳನ್ನು ಪ್ರತಿ ವರ್ಷ ವೀಡೌಟ್ ಮಾಡಬೇಕು ಹಾಗೂ ಖರೀದಿಸಿದ ಪುಸ್ತಕಗಳನ್ನು ಬ್ರಾಂಚ್‌ಗಳಿಗೆ ಸಾಗಾಣಿಕೆ ಮಾಡಿ ಓದುಗರಿಗೆ ನೀಡುವಂತೆ ತಾವು ಕ್ರಮ ತೆಗೆದುಕೊಳ್ಳಲು ವಿನಂತಿಸುತ್ತಿದ್ದೇವೆ.

6. ಸ್ಥಗಿತಗೊಂಡಿರುವ ಯೋಜನೆಗಳು

ಸಾರ್ವಜನಿಕ ಗ್ರಂಥಾಲಯ ಇಲಾಖೆಯಲ್ಲಿ ಈಗಾಗಲೇ ಸ್ಥಗಿತವಾಗಿರುವ ಹೊಂದಾಣಿಕೆ ನೆರವಿನ (Matching grant) ‘ರಾಜಾರಾಮ್ ಮೋಹನ್ ರಾಯ್ ಫೌಂಡೇಶನ್’ ಪುಸ್ತಕ ಖರೀದಿ ಯೋಜನೆ ಹಾಗೂ ಹರಿಜನ ಗಿರಿಜನ ಕ್ಷೇತ್ರಗಳ (SCP/TSP) ಯೋಜನೆ ಪುಸ್ತಕ ಖರೀದಿಯನ್ನು ಜರೂರಾಗಿ ಪ್ರಾರಂಭಿಸಬೇಕು.

7. ಕಾಯ್ದೆಗಳಿಗೆ ತಿದ್ದುಪಡಿ

60 ವರ್ಷಗಳ ಹಿಂದೆ ರಚಿಸಿರುವ 1965ರ ಆಕ್ಟ್ ‘ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ ಕಾಯ್ದೆ’ಗಳಿಗೆ ತಿದ್ದುಪಡಿ ತರಬೇಕು.

ಸರ್ಕಾರದ ಆದೇಶ ಸಂಖ್ಯೆ: ED 1 LIBP 2004 ದಿನಾಂಕ: 7-02-2005ರ ಅನುಬಂಧ-1,2,3ಕ್ಕೆ ತಜ್ಞರ, ಲೇಖಕರ, ಪ್ರಕಾಶಕರ ಅಭಿಪ್ರಾಯ ಪಡೆದು ತಿದ್ದುಪಡಿ ಆದೇಶ ಹೊರಡಿಸಲು ಕೋರುತ್ತಿದ್ದೇವೆ.

8. ಹೊಸ ಗ್ರಂಥಾಲಯಗಳ ಯೋಜನೆ

ನಗರಗಳಲ್ಲಿ ವಾರ್ಡ್‌ಗೆ ಒಂದರಂತೆ, ಗ್ರಾಮೀಣ ಪ್ರದೇಶಗಳಲ್ಲಿ ಹೋಬಳಿಗೊಂದರಂತೆ ಗ್ರಂಥಾಲಯ ಮತ್ತು ಜಿಲ್ಲಾ ಕೇಂದ್ರ ಹಾಗೂ ಶಾಸಕರ ಕ್ಷೇತ್ರಗಳಿಗೆ ಒಂದರಂತೆ ಆಧುನಿಕ ತಂತ್ರಜ್ಞಾನದಿಂದ ಕೂಡಿದ ವಿಶಾಲವಾದ ಹೈಟೆಕ್ ಗ್ರಂಥಾಲಯಗಳನ್ನು ನಿರ್ಮಿಸಬೇಕು.

ಗ್ರಂಥಾಲಯ ಸ್ನೇಹಿ ವಾತಾವರಣವನ್ನು ರೂಪಿಸಬೇಕು. ಅದು ಓದುಗರನ್ನು ಆಕರ್ಷಿಸುವಂತಿರಬೇಕು.

ಕಾಲಕಾಲಕ್ಕೆ ಲೇಖಕರು, ಪ್ರಕಾಶಕರು, ಓದುಗರು, ಚಿಂತಕರನ್ನು ಆಹ್ವಾನಿಸಿ ಗ್ರಂಥಾಲಯಗಳ ಸಮಸ್ಯೆಗಳು ಹಾಗೂ ಪರಿಹಾರಗಳ ಬಗ್ಗೆ ಚರ್ಚಿಸಿ ಆತ್ಮೀಯ ವಾತಾವರಣವನ್ನು ನಿರ್ಮಾಣ ಮಾಡಬೇಕು.

9. ಗ್ರೇಟರ್ ಬೆಂಗಳೂರು (GBA) ಪ್ರಾಧಿಕಾರಕ್ಕೆ

ವಲಯವಾರು ಗ್ರಂಥಾಲಯಗಳ ಹಂಚಿಕೆ ಪ್ರಕ್ರಿಯೆಗೆ ಶೀಘ್ರವಾಗಿ ಪ್ರಸ್ತಾವನೆಯನ್ನು ಇಲಾಖೆಯಿಂದ ಸಲ್ಲಿಸಬೇಕು.

10. ಸಾರ್ವಜನಿಕ ಗ್ರಂಥಾಲಯ ಇಲಾಖೆ

ಸಾರ್ವಜನಿಕರು, ವಿದ್ಯಾರ್ಥಿಗಳು, ಮಹಿಳೆಯರು, ಹಿರಿಯ ನಾಗರಿಕರು, ಸಾಹಿತಿಗಳು, ಪ್ರಕಾಶಕರು, ಓದುಗರು ಇವರಿಗೆಲ್ಲರಿಗೂ ಸಲಹೆ, ಸೂಚನೆ, ಪರಿಹಾರಗಳನ್ನು ನೀಡಲು ಹಾಗೂ ಇಲಾಖಾ ಸಿಬ್ಬಂದಿ, ಅಧಿಕಾರಿಗಳಿಗೆ ಮಾರ್ಗದರ್ಶನ ನೀಡಲು ಅವಶ್ಯವಾಗಿ ಬೇಕಾಗಿರುವ, ಖಾಲಿ ಇರುವ ‘ನಿರ್ದೇಶಕ’ರ ಹುದ್ದೆಯನ್ನು ಶೀಘ್ರವಾಗಿ ಭರ್ತಿ ಮಾಡಬೇಕು ಎಂದು ಕೋರುತ್ತೇವೆ.

ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ರಾಜ್ ಇಲಾಖೆ, ಸಮಾಜಕಲ್ಯಾಣ ಇಲಾಖೆ, ಸರ್ವಶಿಕ್ಷಣ ಕೇಂದ್ರಗಳ ಪುಸ್ತಕ ಆಯ್ಕೆ ಮತ್ತು ಖರೀದಿಯನ್ನು ಸಾರ್ವಜನಿಕ ಗ್ರಂಥಾಲಯ ಇಲಾಖೆಯಲ್ಲಿರುವಂತೆ ಉನ್ನತ ಮಟ್ಟದ ಆಯ್ಕೆ ಸಮಿತಿಗಳನ್ನು ರಚಿಸಿ, ಏಕದಳ ಪದ್ಧತಿಯನ್ನು ಜಾರಿಗೆ ತಂದು ಪಾರದರ್ಶಕವಾಗಿ ಪುಸ್ತಕ ಆಯ್ಕೆ ಮತ್ತು ಖರೀದಿ ನಡೆಯುವಂತೆ ಕ್ರಮ ಜರುಗಿಸಲು ವಿನಂತಿಸುತ್ತೇವೆ.

ಮೇಲಿನ ಹತ್ತು ಅಂಶಗಳನ್ನು ರಾಜ್ಯದ ಮುಖ್ಯಮಂತ್ರಿಯವರು ಪರಾಮರ್ಶಿಸಿ ಸಂಬಂಧಿಸಿದ ಇಲಾಖೆಗಳಿಗೆ ಸೂಚನೆ ನೀಡಿ ಆದೇಶ ಹೊರಡಿಸುವ ಮೂಲಕ ಜ್ಞಾನಪ್ರಸಾರದಲ್ಲಿ ನಿರಂತರವಾಗಿರುವ ನಮಗೆ ಪುಸ್ತಕ ಸಂಸ್ಕೃತಿಯನ್ನು ಪೋಷಿಸಲು ಪ್ರೋತ್ಸಾಹಿಸಬೇಕಾಗಿ ಕಳಕಳಿಯಿಂದ ಪ್ರಾರ್ಥಿಸುತ್ತೇವೆ.

ಕನ್ನಡ ಪುಸ್ತಕ ಸಂಸ್ಕೃತಿಯ ಸರ್ವತೋಮುಖ ಅಭಿವೃದ್ಧಿ ಹಾಗೂ ಪುಸ್ತಕ ಪ್ರೀತಿಯನ್ನು ಉಳಿಸಿ, ಬೆಳೆಸಲು ಶ್ರಮಿಸುತ್ತಿರುವ ಸಂಘದ ಕಾರ್ಯಕ್ರಮಗಳಿಗೆ ಪ್ರೋತ್ಸಾಹ ನೀಡಿ ಸಹಕರಿಸಬೇಕೆಂದು ಘನ ಸರ್ಕಾರವನ್ನು, ಸಾಹಿತ್ಯಾಭಿಮಾನಿಗಳನ್ನು ಹಾಗೂ ಸರ್ವ ಸದಸ್ಯರನ್ನು ಪ್ರೀತಿಯಿಂದ ವಿನಂತಿಸುತ್ತೇವೆ.