1. ಸರ್ಕಾರದ ಆರ್ಥಿಕ ಇಲಾಖೆಯು ಪ್ರತಿ ವರ್ಷದ ಆಯವ್ಯಯದಲ್ಲಿ ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆಯ ಅಧೀನದಲ್ಲಿ ಬರುವ ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ ‘ಕನ್ನಡ ಪುಸ್ತಕಗಳ ಸಗಟು ಖರೀದಿ ಯೋಜನೆ‘ಯಲ್ಲಿ ತಲಾ 500 ಪ್ರತಿಗಳಂತೆ ಕನ್ನಡ ಪುಸ್ತಕಗಳನ್ನು ಖರೀದಿಸಲು ವಾರ್ಷಿಕ 25 ಕೋಟಿ ರೂ.ಗಳ ಅನುದಾನವನ್ನು ಬಜೆಟ್ನಲ್ಲೇ ಮೀಸಲಿಡುವಂತೆ ತಮ್ಮಲ್ಲಿ ಸವಿನಯದಿಂದ ಕೋರುತ್ತೇವೆ.
2. ಜ್ಞಾನಾರ್ಜನೆಗಾಗಿ ಓದಲು ಪುಸ್ತಕಗಳು ಓದುಗರಿಗೆ ಅವಶ್ಯವಾಗಿ ಬೇಕಾಗಿರುವುದರಿಂದ, 3 ವರ್ಷಗಳು ತಡವಾಗಿ ಖರೀದಿಸುತ್ತಿರುವುದನ್ನು ತಪ್ಪಿಸಿ, ಆಯಾಯ ವರ್ಷದಲ್ಲೇ ಪುಸ್ತಕಗಳನ್ನು ಖರೀದಿಸಲು ಕೋರುತ್ತಾ, ಈಗಾಗಲೇ ಆಯ್ಕೆಯಾಗಿರುವ 2020ನೇ ಸಾಲಿನ ಪಟ್ಟಿ ಹಾಗೂ ಆಯ್ಕೆಯಾಗಬೇಕಾಗಿರುವ 2021 ಮತ್ತು 2022ನೇ ಸಾಲಿನ ಪುಸ್ತಕಗಳನ್ನು ಆಯ್ಕೆ ಮಾಡಿ ಖರೀದಿಸಲು 50 ಕೋಟಿ ರೂ.ಗಳನ್ನು ಪ್ರಸಕ್ತ ವರ್ಷದಲ್ಲಿ ವಿಶೇಷ ಅನುದಾನ ಎಂದು ಪರಿಗಣಿಸಿ ಬಿಡುಗಡೆ ಮಾಡಲು ವಿನಂತಿಸುತ್ತೇವೆ. ಈ ಮೂಲಕ ಜ್ಞಾನರ್ಜನೆಗಾಗಿ “ಜ್ಞಾನ ಭಾಗ್ಯ” ಯೋಜನೆ ನೀಡಿದ ಕೀರ್ತಿ ತಮಗೆ ಸಲ್ಲುತ್ತದೆ.
3. ರಾಜ್ಯದ ಪುರಸಭೆ, ನಗರ ಸಭೆ, ಬೃಹತ್‌ ನಗರ ಪಾಲಿಕೆಗಳಿಂದ ಬಾಕಿ ಇರುವ ‘ಗ್ರಂಥಾಲಯ ಕರ’ದ ಮೊತ್ತ ಸುಮಾರು 750 ಕೋಟಿಗೂ ಹೆಚ್ಚು. ಇದರಲ್ಲಿ ಬೃಹತ್ ಬೆಂಗಳೂರು ನಗರ ಪಾಲಿಕೆ ಒಂದರಲ್ಲೇ 600 ಕೋಟಿಗೂ ಹೆಚ್ಚು ಹಣ ಬಾಕಿ ಇದೆ. ಈ ಹಣವನ್ನು ಬೆಂಗಳೂರು ನಗರ ವ್ಯಾಪ್ತಿಯ 5 ವಲಯಗಳಿಗೆ ಪುಸ್ತಕ ಖರೀದಿ ಹಾಗೂ ಸಮಗ್ರ ಅಭಿವೃದ್ಧಿಗಾಗಿ ಬಳಸಲು ಗ್ರಂಥಾಲಯ ಇಲಾಖೆಯ ಲೆಕ್ಕ ಶೀರ್ಷಿಕೆಗೆ ವರ್ಗಾಯಿಸುವಂತೆ ನಿರ್ದೇಶನ ನೀಡಲು ವಿನಂತಿಸುತ್ತೇವೆ.
4. ಸಾರ್ವಜನಿಕ ಗ್ರಂಥಾಲಯ ಇಲಾಖೆ ಹಾಗೂ ಕನ್ನಡ ಪುಸ್ತಕ ಪ್ರಾಧಿಕಾರದ ವ್ಯಾಪ್ತಿಯಲ್ಲಿ ಖರೀದಿಸುವ ಪುಸ್ತಕಗಳ ಪಟವಾರು ಬೆಲೆಯನ್ನು ಪರಿಷ್ಕರಿಸುವ ಬಗ್ಗೆ ತಮ್ಮ ಅಮೂಲ್ಯವಾದ ಗಮನವನ್ನು ಸೆಳೆಯುತ್ತಾ, ಸರ್ಕಾರಿ ಆದೇಶದ ಸಂಖ್ಯೆ ಇಡೀ 234 ಎಲ್‌ಐಬಿ 2015 ದಿನಾಂಕ : 22-12-2017ರಲ್ಲಿ ಪುಟಕ್ಕೆ 20 ಪೈಸೆಯನ್ನು ದಿನಾಂಕ : 01-04-2018 ರಿಂದ ಅನ್ವಯಿಸುವಂತೆ ಹೆಚ್ಚಿಸಿ ಆದೇಶಿಸಲಾಗಿತ್ತು. ಈಗಾಗಲೇ ಐದು ವರ್ಷಗಳು ಕಳೆದಿವೆ. ಇತ್ತೀಚಿನ ದಿನಗಳಲ್ಲಿ ಕಾಗದ, ಇಂಕು, ಬೈಂಡಿಂಗ್, ಮುದ್ರಣ, ಕೂಲಿ, ಸಾಗಾಣಿಕೆ, ಜಿಎಸ್‌ಟಿ ಎಲ್ಲವೂ ಹೆಚ್ಚಾಗಿದ್ದು ಪುಸ್ತಕ ಪ್ರಕಟಿಸುವುದು ಕಷ್ಟಸಾಧ್ಯವಾಗಿದೆ. ಆದ್ದರಿಂದ ದಯಮಾಡಿ ಹಾಲಿ ಇರುವ ಬೆಲೆಯ ಮೇಲೆ ಪುಟಕ್ಕೆ 40 ಪೈಸೆಗಳ ಹೆಚ್ಚಳ ಮಾಡಿ ಆದೇಶ ಹೊರಡಿಸಲು ಪ್ರಾರ್ಥಿಸುತ್ತೇವೆ.
5. ಕರ್ನಾಟಕ ಸಾರ್ವಜನಿಕ ಗ್ರಂಥಾಲಯಗಳ ಅಧಿನಿಯಮ, 1956 ಅಧ್ಯಾಯ- 5 ಹಣಕಾಸು ಮತ್ತು ಲೆಕ್ಕಪತ್ರಗಳು-ಉಪನಿಯಮ 30 (1) (2) (3) (4)ರ ಪ್ರಕಾರ ಕ್ರಮ ಜರುಗಿಸಿ, ಬೆಂಗಳೂರು ಬೃಹತ್ ಮಹಾನಗರ ಪಾಲಿಕೆ, ನಗರ ಪಾಲಿಕೆಗಳು, ಪುರಸಭೆಗಳು, ಪಟ್ಟಣ ಪಂಚಾಯತಿಗಳು ಸಂಗ್ರಹಿಸುತ್ತಿರುವ ಶೇಕಡ 6ರಷ್ಟು ಗ್ರಂಥಾಲಯ ಕರವನ್ನು ನೇರವಾಗಿ ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ ‘ಮುಖ್ಯ ಲೆಕ್ಕ ಶೀರ್ಷಿಕೆ’ಗೆ ಜಮಾ ಆಗುವಂತೆ ನಗರಾಭಿವೃದ್ಧಿ ಇಲಾಖೆಯೊಂದಿಗೆ ಸಮಾಲೋಚಿಸಿ ಆದೇಶ ಹೊರಡಿಸಿದರೆ ಪುಸ್ತಕ ಖರೀದಿ, ಡಿಜಿಟಲೈಸೇಷನ್, ಕಟ್ಟಡ ನಿರ್ಮಾಣ ಹಾಗೂ ಗ್ರಂಥಾಲಯಗಳ ಅಭಿವೃದ್ಧಿಗೆ ಅನುಕೂಲವಾಗುತ್ತದೆ ಎಂದು ತಮ್ಮನ್ನು ಕಳಕಳಿಯಿಂದ ಕೋರುತ್ತೇವೆ.
6. ಸಾರ್ವಜನಿಕ ಗ್ರಂಥಾಲಯ ಇಲಾಖೆಯಲ್ಲಿನ ವಾರ್ಷಿಕ ಆಯವ್ಯಯವನ್ನು “ಕರ್ನಾಟಕ ಸಾರ್ವಜನಿಕ ಗ್ರಂಥಾಲಯ ಇಲಾಖೆಯ-ಲೆಕ್ಕಪತ್ರಗಳ ನಿಯಾಮವಳಿಗಳು 1975 ಅಧ್ಯಾಯ-11 ಬಜೆಟ್ ಉಪನಿಯಮ 30 (ಎ), (ಬಿ), (ಸಿ)” ಪ್ರಕಾರ ಪ್ರತಿಯೊಂದು ಗ್ರಂಥಾಲಯದ ಪ್ರಾಧಿಕಾರವು ಮುಂಬರುವ ವರ್ಷಕ್ಕಾಗಿ ನಿರೀಕ್ಷಿತ ಸ್ವೀಕೃತಿ ಮತ್ತು ಉದ್ದೇಶಿತ ಖರ್ಚುಗಳ ಅಂದಾಜು ಸಿದ್ಧಪಡಿಸಿ ಪ್ರತಿ ವರ್ಷದ ಜನವರಿ ತಿಂಗಳ ಮೊದಲ ವಾರದಲ್ಲಿ ವಿಶೇಷ ಸಭೆಯಲ್ಲಿ ಮಂಡಿಸಿ ಅನುಮೋದನೆ ಪಡೆದು, ರಾಜ್ಯ ಗ್ರಂಥಪಾಲಕರು ಅಂದರೆ ನಿರ್ದೇಶಕರು ಪ್ರತಿವರ್ಷ ಮಾರ್ಚ್ 15ರೊಳಗೆ ಅನುಮೋದಿಸಿ, ಅನುಮೋದಿತ ಬಜೆಟ್ ಪ್ರತಿಯನ್ನು ಸಂಬಂಧಿಸಿದವರಿಗೆ ಕಳುಹಿಸಬೇಕು ಎಂದು ಇದೆ. ಆದರೆ ಕಳೆದ ನಾಲ್ಕು ವರ್ಷಗಳಿಂದಲೂ ಆರ್ಥಿಕ ವರ್ಷದ ಅಂತ್ಯದಲ್ಲಿ ಸರ್ಕಾರದಿಂದ ಅನುಮೋದನೆಯಾಗಿ ಬರುತ್ತಿದೆ. ಇದರಿಂದಾಗಿ ಹಲವು ಯೋಜನೆಗಳು ಪೂರ್ಣವಾಗದೆ ಗ್ರಂಥಾಲಯದ ಅಭಿವೃದ್ಧಿ ಕುಂಠಿತವಾಗುತ್ತಿದೆ. ವರ್ಷದ ಅಂತ್ಯದಲ್ಲಿ ತರಾತುರಿಯಲ್ಲಿ ಆಯವ್ಯಯದ ಬಳಕೆಯಾಗುತ್ತಿದೆ. ದಯಮಾಡಿ ವಾರ್ಷಿಕ ಆಯವ್ಯಯ (ಬಜೆಟ್) ಅನುಮೋದನೆಯನ್ನು ಗ್ರಂಥಾಲಯ ಪ್ರಾಧಿಕಾರಗಳಿಂದ ಬರುವ ಬಜೆಟ್‌ನ್ನು ನಿರ್ದೇಶಕರು ಅನುಮೋದನೆ ನೀಡಿ ಈ ಪ್ರಕ್ರಿಯೆಗಳನ್ನು ಪ್ರತಿವರ್ಷ ಮೇ, ಜೂನ್ ತಿಂಗಳಿನಲ್ಲಾದರೂ ಮುಗಿಸಿ ಪುಸ್ತಕಗಳ ಖರೀದಿ ಹಾಗೂ ಗ್ರಂಥಾಲಯಗಳ ಸಮಗ್ರ ಅಭಿವೃದ್ಧಿಗೆ ಗಮನ ಹರಿಸುವಂತೆ ಆದೇಶ ನೀಡಲು ವಿನಂತಿಸುತ್ತೇವೆ.
7. ಕನ್ನಡ ಪುಸ್ತಕೋದ್ಯಮದ ಬಹುದೊಡ್ಡ ಸವಾಲು ಎಂದರೆ- ಕನ್ನಡ ಪುಸ್ತಕಗಳ ಮಾರಾಟಕ್ಕೆ ಸರಿಯಾದ ಪ್ರಚಾರ, ಪ್ರೋತ್ಸಾಹ ಇಲ್ಲದೆ ಸೊರಗಿರುವ ಮಾರಾಟ ಜಾಲ. ಸರ್ಕಾರದ ಅಂಗ ಸಂಸ್ಥೆಯಾದ ಕನ್ನಡ ಪುಸ್ತಕ ಪ್ರಾಧಿಕಾರದ ನೀತಿ, ನಿಯಮಗಳನ್ನು ಬದಲಿಸಿ, ಖಾಸಗಿಯಾಗಿ ಪ್ರಕಟಿಸುತ್ತಿರುವ ಸಾವಿರಾರು ಲೇಖಕ,ಲೇಖಕ-ಪ್ರಕಾಶಕ, ಸಣ್ಣ ಪ್ರಮಾಣದ ಪ್ರಕಾಶಕರನ್ನು ಒಂದೇ ಸೂರಿನಡಿ ತಂದು, ಪುಸ್ತಕ ಪ್ರಕಟಿಸುವ ವಿಧಿ-ವಿಧಾನಗಳ ಬಗ್ಗೆ ತರಬೇತಿ ನೀಡಿ, ನಗರ, ಜಿಲ್ಲೆ ಹಾಗೂ ತಾಲ್ಲೂಕು ಬಸ್‌ ನಿಲ್ದಾಣಗಳಲ್ಲಿ ಪುಸ್ತಕ ಮಾರಾಟ ಮಳಿಗೆಗಳನ್ನು ತೆರೆದು ಮಾರಾಟದ ನಂತರ ಪಾವತಿ ಆಧಾರದ ಮೇಲೆ ಖಾಸಗಿಯವರಿಂದ ಪುಸ್ತಕಗಳನ್ನು ತರಿಸಿಕೊಂಡು ಮಾರಾಟ ಮಾಡುವ ವ್ಯವಸ್ಥೆಯನ್ನು ಜಾರಿಗೆ ತರುವ ಮೂಲಕ ಖಾಸಗಿ ಪ್ರಕಾಶಕರಿಗೆ ಪ್ರೋತ್ಸಾಹ ನೀಡುವ ಈ ಯೋಜನೆಯನ್ನು ಕಾರ್ಯರೂಪಕ್ಕೆ ತರಬೇಕೆಂದು ಅನೇಕ ವರ್ಷಗಳಿಂದ ನಾವು ಸರ್ಕಾರವನ್ನು ಒತ್ತಾಯಿಸುತ್ತಿದ್ದೇವೆ.
8. ಸಾರ್ವಜನಿಕ ಗ್ರಂಥಾಲಯ ಇಲಾಖೆಯು ಹೋಬಳಿಗೊಂದು ಸುಸಜ್ಜಿತವಾದ ಶಾಖಾ ಕೇಂದ್ರ ಗ್ರಂಥಾಲಯವನ್ನು ಸ್ಥಾಪಿಸುವುದು, ಕನ್ನಡ ಪುಸ್ತಕ ಪ್ರಾಧಿಕಾರ, ವಯಸ್ಕರ ಶಿಕ್ಷಣ ಇಲಾಖೆಯ ನವ ಸಾಕ್ಷರತಾ ಯೋಜನೆ, ಸರ್ವಶಿಕ್ಷಣ ಅಭಿಯಾನ, ಸಾರ್ವಜನಿಕ ಶಿಕ್ಷಣ ಇಲಾಖೆ, ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆ, ಸಮಾಜ ಕಲ್ಯಾಣ ಇಲಾಖೆಯಲ್ಲಿನ ಪುಸ್ತಕಗಳ ಸಗಟು ಖರೀದಿ ಯೋಜನೆಗಳಲ್ಲಿನ ಪುಸ್ತಕಗಳ ಆಯ್ಕೆ ಮತ್ತು ಖರೀದಿ ಪ್ರಕ್ರಿಯೆಗಳಲ್ಲಿ ಪುಸ್ತಕ ಆಯ್ಕೆ ಸಮಿತಿಗಳನ್ನು ರಚಿಸಿ ಪಾರದರ್ಶಕತೆಯನ್ನು ಕಾಯ್ದುಕೊಳ್ಳಲು ಹಾಗೂ ಖರೀದಿ ಸ್ಥಗಿತವಾಗಿರುವ ಕೆಲವು ಇಲಾಖೆಗಳಲ್ಲಿ ಪುಸ್ತಕ ಖರೀದಿ ಪ್ರಕ್ರಿಯೆ ಪ್ರಾರಂಭಿಸಲು ಸಂಬಂಧಿಸಿದವರಿಗೆ ಕಟ್ಟುನಿಟ್ಟಿನ ನಿರ್ದೇಶನ ನೀಡಲು ಮುಖ್ಯಮಂತ್ರಿಗಳನ್ನು ಒತ್ತಾಯಿಸುತ್ತಿದ್ದೇವೆ.

ಮೇಲಿನ ಎಂಟು ಅಂಶಗಳನ್ನು ರಾಜ್ಯದ ಮುಖ್ಯಮಂತ್ರಿಯವರು ಪರಾಮರ್ಶಿಸಿ ಸಂಬಂಧಿಸಿದ ಇಲಾಖೆಗಳಿಗೆ ಸೂಚನೆ ನೀಡಿ ಆದೇಶ ಹೊರಡಿಸುವ ಮೂಲಕ ಜ್ಞಾನಪ್ರಸಾರದಲ್ಲಿ ನಿರತರಾಗಿರುವ ಕನ್ನಡ ಪುಸ್ತಕೋದ್ಯಮವನ್ನು ಪೋಷಿಸಿ ಪ್ರೋತ್ಸಾಹಿಸಬೇಕಾಗಿ ಕಳಕಳಿಯಿಂದ ಪ್ರಾರ್ಥಿಸುತ್ತೇವೆ.

ಕನ್ನಡ ಪುಸ್ತಕೋದ್ಯಮದ ಸರ್ವತೋಮುಖ ಅಭಿವೃದ್ಧಿ ಹಾಗೂ ಪುಸ್ತಕ ಪ್ರೀತಿಯನ್ನು ಉಳಿಸಿ, ಬೆಳೆಸಲು ಶ್ರಮಿಸುತ್ತಿರುವ ಸಂಘದ ಕಾರ್ಯಕ್ರಮಗಳಿಗೆ ಪ್ರೋತ್ಸಾಹ ನೀಡಿ ಸಹಕರಿಸಬೇಕೆಂದು ಘನ ಸರ್ಕಾರ ಹಾಗೂ ಸರ್ವ ಸದಸ್ಯರನ್ನು ಪ್ರೀತಿಯಿಂದ ವಿನಂತಿಸುತ್ತೇವೆ.